Aruba, minister Oduber FOICE posibilidad atractivo

woensdag 04 februari 2015 22.42 uur | laatst gewijzigd: zondag 20 augustus 2017 03.04 uur | auteur: Ton Jansen

Proyecto di ferry entre Aruba, Bonaire y Corsow ta un posibilidad atractivo pa e 3 islanan

Minister Otmar Oduber a reuni diaranson mainta cu un grupo cu ta studiando e posiblidadnan pa bin cu un ferry entre islanan ABC (aruba, Bonaire y Corsou), un posibilidad cu ta mustra interesante riba diferente nivel pa desaroyo di e tres islanan.

E mandatario a duna di conoce cu aproximadamente 5 aña pasa a tuma lugar un presentacion dor di un grupo priva pa loke ta trata e posibilidad di un ferry entre e islanan y Venezuela, pero ainda tabatin puntonan cu no a wordo elabora totalmente riba nan y awor a bolbe haya e presentacion.

Durante esaki por remarca cu a cambia e structura di pensamento cu tabatin, e ta uno mas amplio cu djis esun turistico y ta mira e parti economico y e desaroyo cu lo por tin entre e islanan. E proyecto ta crea e posibilidad cu entre e 3 islanan por bin cu un ferry, tresiendo sinergia den e sistema di duane y imigracion entre e islanan y ta haci posibel cu turismo y desaroyonan economico lo por tuma lugar logrando di e forma aki un intercambio hopi mas avanza cu loke e ta na e momentonan aki. Tambe por mira e posibilidadnan di intercambio deportivo y cultural entre islanan ABC.

E proyecto den su bachi nobo a hala atencion di e mandatario y a palabra cu dentro di 1 siman lo bin bek na otro pa mira kico e posibilidadnan ta pa Aruba participa den e estudionan necesario pa por mira kico lo ta e consecuencianan positivo y tambe e debilidadnan di un proyecto asina. Tambe Minister Oduber a bisa cu el lo tuma contacto cu e otro parti pa mira e interes di nan parti y haci di esaki un proyecto entre e 3 islanan.

Rafael Estrada, un di e personanan cu ta encarga cu e proyecto di ferry cu yama FOICE (Ferry Onderzoek Inter Caribbean Express). Ta trata aki di un proyecto di un fast ferry cu kier trece manera e mandatario a bisa entre Aruba, Bonaire y Corsow cu lo duna mas contenido na e mocionnan cu Parlamentonan di Aruba, Hulanda, Corsow y Sint Maarten a tuma pa tin un trafico liber di persona y biennan entre Aruba, Bonaire y Corsow.

Sr. Estrada a duna di conoce cu nan ta purbando di haci un estudio final y e lo por keda cla dentro di 3 pa 4 luna y despues di esey lo keda na e 3 gobiernonan pa tuma un decision y e ferry lo por cuminsa opera un 6 luna despues.